ENTERTAINMENTගොසිප් පුවත්තරු හුට පට

නවකතාවක චරිතයකින් ජනප්‍රිය වෙන්න අමාරුයි – ‘දෙවෙනි ඉනිම’ ටෙලිනාට්‍ය ලංකාවේ ජනප්‍රියතම ටෙලිනාට්‍යයක් බවට පත්වෙලා

යෞවනත්වයේ ජනප්‍රියතම ආදරණීය නවකතාවක් ලෙසට ‘බොඳ මීදුම්’ නවකතාව හඳුන්වන්නට පුළුවන්. ඒ නවකතාවේ පිටකවරය හැඩ ගන්වමින් ජනතා ආදරය දිනාගත් ඇය, අද වන විට ජනප්‍රිය රංගන ශිල්පිනියක් බවට පත්වෙලා. මේ වන විට ටෙලිනාට්‍ය කිහිපයකම ඇයගේ රංගන භූමිකාවන් අපගේ නෙතට ගැටෙන මොහොතක ඇය සමඟ අප කතා කිරීමට හිතුවා. ඇය අංජලී ලියනගේ. එදා ‘සංසලා’ විදියට ඔබේ හිතේ රැඳුණු ආදරණීය හිතවතිය අපිත් එක්ක කතා කළේ මේ විදියට.

අංජලී මේ දවස්වල සීගිරියට කොටුවෙලා නේද?

ඔව්… ලක්‍ෂ්මන් පුෂ්පකුමාරගේ ‘හදවිල අරණ’ ටෙලිනාට්‍යයේ වැඩකටයුතු එක්ක සම්බන්ධ වෙලා ඉන්නේ.

අපි දකින ඔබගේ අනෙකුත් චරිතවලට වඩා ‘හදවිල අරණ’ ටෙලිනාට්‍යයේ වෙනස් රංග භූමිකාවක් ‘හිමාලිගෙන්’ දකිනවා?

මම එහි ‘හිමාලි’ගේ චරිතය තමයි නිරූපණය කරන්නේ. ඒ වෙනස ගොඩදෙනෙක්ට දැනිලා තිබෙනවා. ‘හදවිල අරණ’ ගමේ සුවඳ දැනෙනා කතාවක්. මමත් ගොඩාක් ආශාවෙන් තමයි ‘හිමාලි’ චරිතය රඟපාන්නේ. මොකද ගැමි චරිත නිරූපණය කිරීමේ ලොකු ආශාවක් තිබෙනව මට. එවැනි චරිත තුළින් අපිටත් ගොඩාක් දේවල් එකතු කරගැනීමට හැකි වෙනවා. ඒ නිසාමයි මට ගැමි චරිත නිරූපණය කිරීමට ලොකු ආශාවක් තියෙන්නේ.

ඔබ ජනප්‍රියතම ටෙලිනාට්‍යයක අඛණ්ඩව එක දිගට නිරත වී සිටිනවා. ඉතින් කොහොමද මේ සියල්ල කළමනාකරණය කරගන්නේ?

‘දෙවෙනි ඉනිම’ ටෙලිනාට්‍ය ලංකාවේ ජනප්‍රියතම ටෙලිනාට්‍යයක් බවට පත්වෙලා. මම මේ ක්‍ෂේත්‍රයට සම්බන්ධ වෙලා වැඩකටයුතු කළත් මාව ගොඩදෙනෙක් දැනහඳුනාගත්තේ ‘දෙවෙනි ඉනිම’ හරහා. මම ඒ ටෙලිනාට්‍යයේ අනුෂාගේ චරිතය තමයි රඟපාන්නේ. අවුරුදු හතරක් විතර මම ‘දෙවෙනි ඉනිම’ සමඟ එකට අත්වැල් බැඳගෙන එකම පවුලක් ලෙස වැඩ කරගෙන යන අතරතුර අනෙකුත් නිර්මාණ සඳහා සම්බන්ධ වෙනවා. අනෙක මම තෝරා බේරාගෙන වැඩකරන නිසා කරන වැඩවලට ප්‍රශ්නයක් නොවන විදියට වැඩකරනවා. හැම දෙයක්ම කාලය කළමනාකරණ කරගෙන තමයි වැඩ කරන්නේ. ඔය අතර මම හදවතේ කතාව ටෙලිනාට්‍යයටත් සම්බන්ධ වෙනවා. ප්‍රේක්‍ෂකයන්ගෙන් ලැබෙන ප්‍රතිචාර එකිනෙකට වෙනස්.

ඔබගේ තිබෙන ජනප්‍රියතාවයත් එක්ක වේදිකාවේ ඉඩක් නැතිද?

වේදිකාවට මම ගොඩාක් කැමැතියි. වේදිකා නාට්‍ය කිහිපයකටම මම සම්බන්ධ වුණා. මම වේදිකාව අමතක කරලා නැහැ. වේදිකා නාට්‍යයක් සඳහා සම්බන්ධ වෙනවා කියන්නේ එය වෙනුවෙන් මට ලොකු කාලයක් කැප කරන්න වෙනවා. මේ වැඩකටයුතු ඉවර වුණාට පසුව හොඳ වේදිකා නිර්මාණයකට සම්බන්ධ වීමේ බලාපොරොත්තුව තියෙනවා.

ආදරණීය සැමියා ජනප්‍රිය ගායන ශිල්පියෙක්. ඔහුට ලැබෙන ඔබගේ සහාය කොයිවගේද?

ඔහු තරිඳු පෙරේරා. වාදන ශිල්පියෙක් වගේම ගායකයෙක්. කොරෝනා ප්‍රශ්න නිසා ප්‍රසංගවල වැඩකටයුතු නැහැ. මට පුළුවන් උපරිම සහාය ඔහුට ලබාදෙමින් සතුටින් ඉන්නවා. වෙලාවකට අපි දෙන්නාම කාර්යබහුලයි. එහෙම වුණා කියලා අපේ ආදරය අඩුවක් නැහැ. අපි සතුටින් ඉන්නවා. කලාව කියන දේ ගැන හොඳ අවබෝධයක් අපි දෙන්නාටම තිබෙන නිසා ප්‍රශ්නයක් නැහැ.

ඔබ මේ ක්‍ෂේත්‍රයට සම්බන්ධ වන්නේ හෙළ සිනමා රැජන සමඟ එකට රඟපාමින්?

මම රඟපාපු පළමු ටෙලිනාට්‍ය තමයි ‘දෝණි.’ ඒ නිර්මාණය සමඟ තමයි මට ඇය සමඟ එකට රඟපෑමට වාසනාව හිමිවුණේ. මගේ රංගනය හරිම තැනකින් පටන් ගන්න ලැබීම එක ගැන මම සතුටු වෙනවා. වර්තමානයේ අපි සමඟ වැඩ කරන සමහරක් නවක ශිල්පීන්ට වඩා ඇය නිහතමානී චරිතයක්. එදා වගේම අදටත් එතුමියට ආදරය, ගෞරවය මගේ හදවතේ තිබෙනවා.

‘බොඳ මීදුම්’ නවකතාවේ ‘සංසලා’ වීමේ වාසනාව වීම නේද මේ හැම දෙයකටම මුල?

නිර්මාණයක චරිතයක් නිරූපණය කරලා ජනප්‍රිය වනවාට වඩා නවකතාවක පිටකවරයක් තුළින් මාව ජනප්‍රිය වුණා. ‘බොඳ මීදුම්’ නවකතාවේ පිටකවරයෙන් තමයි මාව ගොඩදෙනෙක් හඳුනගත්තේ. මොකද ඒ නවතකාවේ ප්‍රධාන කතා නායිකාව තමයි ‘සංසලා’ චරිතය. ඉතින් නවකතාව කියවන පාඨකයන් මගේ රූපය තමයි හිතේ මවා ගත්තේ ‘සංසලා’ විදියට. නවකතාවක පිටකවරයකින් ජනප්‍රියතාවය ලබන්න හරිම අමාරුයි. ඒත් ඒ වාසනාව මට ලැබුණා.

වසන්ත විතාරණගේ
මව්රට

Related Articles

Leave a Reply

Your email address will not be published. Required fields are marked *

Back to top button