custom_html_banner1
දේශීය පුවත්

කොවිඩ් පාලනය වන තෙක් සංචරණ සීමා දිගටම ඕනෑ – විශේෂඥ වෛද්‍යවරුන් කියයි

custom_html_banner1
Spread the love

දැනට පනවා ඇති සංචරණ සහ අනෙකුත් සීමා කොවිඩ් රෝගය පාලනය කළ හැකි මට්ටමකට පැමිණෙන තෙක් තවදුරටත් පවත්වාගෙන යන ලෙස විශේෂඥ වෛද්‍යවරුන්ගේ සංගමය යෝජනා කර සිටියි.

එම සංගමයේ සභාපති විශේෂඥ වෛද්‍ය ලක්කුමාර් ප්‍රනාන්දු සහ ලේකම් විශේෂඥ වෛද්‍ය ආර්. ඥානසේකරම්ගේ අත්සනින් යුතුව නිකුත් කර ඇති මාධ්‍ය නිවේදනයක මේ බව සඳහන් වෙයි. එම මාධ්‍ය නිවේදනයේ වැඩිදුරටත් මෙසේ ද දැක්වෙයි.

කොරෝනා වසංගතය දැනට වඩා සීග්‍ර ලෙස වර්ධනය වීමකට ලක් වුවහොත් පුද්ගල මරණ සංඛ්‍යාව හේතු දෙකක් නිසා වැඩිවිය හැක. එනම් කොරෝනා රෝගය නිසාම සිදු වූ මරණ සහ කොරෝනා රෝගීන්ගෙන් ආරෝග්‍යශාලා අනවශ්‍ය ලෙස පිරී යාමෙන් සෞඛ්‍ය අංශයේ සිදුවන අඩපණභාවය නිසා කොරෝනා නොවන එහෙත් අනිකුත් ප්‍රතිකාර කළ හැකි රෝගීන්ට ප්‍රතිකාර කිරීමට නොහැකි වීමෙන් සිදුවන මරණයි.

මේ නිසා අප යෝජනා කරන්නේ දැනට පනවා ඇති සංචරණ සහ අනිකුත් සීමා මෙම රෝගය පාලනය කළ හැකි මට්ටමකට පැමිණෙන තෙක් තවදුරටත් පවත්වාගෙන යන ලෙසයි.

මේ අවස්ථාවේදී අප සියලු ජනතාවගෙන් ඉල්ලා සිටින්නේ රජය පනවා ඇති සංචරණ සීමා සහ අනිකුත් සීමා කිරීම් තමන්ගේ එදිනෙදා ජීවිතවලට කොතරම් බලපෑම් කළ ද තමන්ගේ සහ බහුතරයක් ජනතාවගේ සුබසිද්ධිය සඳහා උපේක්ෂා සහගතව මුහුණ දීමට ධෛර්යයෙන් කටයුතු කරන ලෙසයි.

එමෙන්ම මෙම ඉතා සංවේදී අවස්ථාවේදී සියලුම ජාති හිතෛෂී ජනතාවගෙන්, මාධ්‍ය ආයතනවලින් සහ සියලුම දේශපාලන සංවිධානවලින් ඉල්ලා සිටින්නේ තමන්ගේ පෞද්ගලික මත භේද අමතක කොට රටේ පොදු සුබසිද්ධිය උදෙසා එකට එක් වී කටයුතු කරන ලෙසයි.

එමෙන්ම අප සියලුම ජාති හිතෛෂී සංවිධානවලින් ඉල්ලා සිටින්නේ හැකිතරම් දුරට මෙම කරුණු මහ ජනතාවට තේරුම් කරදී ඒවාට අනුකූල වීමට අවශ්‍ය උපදෙස් ලබාදෙන ලෙසයි. අවශ්‍ය නම් ධනාත්මක සංවාදවලින් රජයට සහ සියලුම සෞඛ්‍ය සංවිධානවලට අවශ්‍ය උපදෙස් ලබා දීමෙන් අප රටේ මහ ජනතාවගේ පොදු සුබසිද්ධිය සඳහා කටයුතු කිරීමට මෙය අවස්ථාවක් කර ගන්නා ලෙසයි.

custom_html_banner1

අවසාන වශයෙන් ඉතා වැදගත් වන්නේ රෝගය පැතිරීම හැකිතරම් අඩු කිරීමෙන් රට නැවත යථා තත්ත්වයට ගෙන ඒමට අවශ්‍ය කටයුතු කිරීමයි. පොදු අරමුණකින් කටයුතු කිරීමෙන් මෙය පාලනය කළ හැකි බවත් අපගේ දැඩි විශ්වාසයයි.

Courtesy – Aruna 

custom_html_banner1

Related Articles

Leave a Reply

Your email address will not be published. Required fields are marked *

Back to top button